Павлодарда білім беру басқармасының бастығы Бақыт Бексейітова қол астындағы қызметкерін сотқа берді. Оның айтуынша, мемлекеттік қызметкер бастығы туралы жалған ақпарат таратқан. Онымен қоймай, абыройына нұқсан келтіріпті.
Даудың басы ғаламтордан басталған. Әңгімені әріден бастайық. Облыстық білім беру басқармасы мемлекеттік сатып алу бөлімінің бастығы Айдар Мұсайыпов Бақыт Бексейітованың «былығын» білім және ғылым министрінің блогына жариялап жіберген. Арызданушы мемлекеттік мекемеде жең ұшынан жалғасқан жемқорлықтың бәрін министрге жайып салған. «Тендер өрескел заң бұзушылықпен өткізіледі, мектеп директорларына қысым көрсетіледі», – деп жазады Айдар Мұсайыпов. КТК телеарнасының хабарлауынша, қаржы полициясы бұл мәселені «май шаммен» қараған. Тексеру нәтижесінен кейін қаржы полициясы бастықтың емес, шағымданушының әрекетінен заңбұзушылық тауып, ескертпе қағаз жіберген. «Мен туралы шындыққа жанаспайтын ақпарат таратып, ар-ожданыма нұқсан келтірді» деген сөзді алға тартқан аймақтың бас ұстазы Бақыт Бексейітова өз қызметкерін сотқа беріпті. Ал судья басқарма бастығының шағымына негізсіз деген үкім шығарды. Б.Бексейітованың адвокаты Болат Мағзұмов сот үкімімен келіспейтінін айтады. «Екі қошқардың басы бір қазанға симас» деген осы ғой.