Шымкентте полиция қызметкері көлігімен 16 жасар қызды қағып кетті. Соққының қатты болғаны сонша бойжеткен 60 метрге ұшып кеткен. Ал жол апатына себепкер болған тәртіп сақшысы оқиға орнынан із суытпақ болған.

Қазір ол қамауда отыр. Ал ауыр жарақат алған өрімдей қыз ауруханада жан тәсілім етті. Адам өлімімен аяқталған жол апаты сол қиылыста тоқтап тұрған көліктің бірінің бейнеқондырғысына кездейсоқ түсіп қалған. Белгілі болғандай, көлікті полиция майоры басқарыпты. Ол жерде, тіпті, арнайы ескерту белгілері де орнатылған. Алайда шетелдік көлік тізгініндегі тәртіп сақшысы жол ережесіне сай, жүргіншілер жолағына жақындағанда жылдамдықты тежемек түгілі, оқиға орнынан жүйткіп өтіп, ізін суытпақ болған. Оны сол көшеде кетіп бара жатқан өзге жүргізушілер тоқтауға мәжбүрлеген. Бір қызығы, қайғылы оқиға 21қараша күні орын алса да, полиция қызметкерлері оны жариялауға асықпапты. Жол апатын жасаған полиция майоры мас болған деген дерек бар. Онысын енді арнайы сараптама анықтайтын болады.